Samþykktir fyrir Hollvinafélag Menntaskólans í Reykjavík

1.       grein: Nafn félagsins

Nafn félagsins er Hollvinafélag Menntaskólans í Reykjavík, skammstafað HMR, – kt. 650214-0720. Félagið var stofnað í Reykjavík, 1. desember 2013.

2.       grein: Heimili og tilgangur

Heimili félagsins og varnarþing er í Reykjavík. Tilgangur félagsins er að styðja við, efla og styrkja starf Menntaskólans í Reykjavík og nemenda hans. Skal tilganginum náð með öflun fjár til þeirrar starfsemi, veitingu styrkja til einstakra verkefna og með því að hvetja til styrktar starfinu á opinberum vettvangi.

3.       grein: Um aðild að félaginu

Félagar geta orðið allir þeir sem styðja vilja markmið félagsins. Þeir stúdentar sem hafa útskrifast frá MR verða sjálfkrafa félagar í HMR nema þeir óski annars.

4.       grein: Félagaskrá og slit félagsins

Félagsgjöld verða ekki innheimt í HMR. Haldin skal rafræn félagaskrá. Enginn félagsmaður á tilkall til hluta af sjóðum félagsins eða öðrum eignum þess, þó að hann hverfi úr félaginu eða félaginu verði slitið. Félagsmenn bera ekki persónulega ábyrgð á skuldum eða öðrum skuldbindingum félagsins.

Félagið verður ekki leyst upp eða starfsemi þess hætt nema stjórn geri tillögu um það. Komi slík tillaga fram er stjórninni skylt að boða til slitafundar sem tekur afstöðu til tillögunnar. Til fundarins skal boða með minnst 14 daga fyrirvara með sama hætti og aðalfund félagsins. Við slit á félaginu skulu eignir þess renna til málefna sem tengjast tilgangi félagsins. Stjórn sú, er síðast var löglega kosin, skal sjá til þess að lagaákvæði þessu sé framfylgt og þeim samþykktum, er áður greindur slitafundur ákvað.

5.       grein: Ársreikningur

Reikningsár félagsins er almanaksárið. Stjórnin skal hafa lokið gerð ársreiknings og lagt fyrir skoðunarmenn eigi síðar en einum mánuði fyrir aðalfund.

6.       grein: Stjórn

Stjórn félagsins skal skipuð níu félagsmönnum, formanni og átta meðstjórnendum. Stjórn skal kosin á aðalfundi. Stjórnin kýs formann og varaformann og skiptir með sér verkum að öðru leyti á fyrsta stjórnarfundi sem haldinn er eftir aðalfund félagsins. Stjórn skal annast málefni félagsins milli aðalfunda. 

7.       grein: Aðalfundur

Aðalfundur félagsins skal haldinn ár hvert, eigi síðar en 7. júní. Til hans skal boðað með minnst 14 daga fyrirvara með auglýsingu á heimasíðu félagsins og heimasíðu skólans. Aðalfundur er löglegur, sé rétt til hans boðað. Framboð til stjórnar skulu hafa borist með minnst 7 daga fyrirvara. Tillögur sem leggja á fyrir aðalfund skulu hafa borist stjórn eigi síðar en 7 dögum fyrir aðalfund. Rétt til setu á aðalfundi hafa félagsmenn HMR. Dagskrá fundarins skal vera sem hér segir:

• Formaður setur fundinn·
• Kosning fundarstjóra og fundarritara
• Skýrsla stjórnar lögð fram til umræðu
• Framlagning ársreikninga til umræðu og samþykktar
• Tillögur að breytingum á samþykktum félagsins
• Aðrar tillögur rétt fram bornar
• Kosning níu stjórnarmanna
• Kosning tveggja skoðunarmanna
• Önnur mál

Einfaldur meirihluti félagsmanna ræður úrslitum mála á aðalfundi.

8.       grein: Gildistaka

Þar sem ákvæði þessa samþykkta segja ekki til um hvernig með skuli farið skal hlíta ákvæðum laga nr. 110/2021 um félög til almannaheilla, svo og öðrum lagaákvæðum er við geta átt.

Samþykktir þessar voru samþykktar á stofnfundi 2013 og breytingar gerðar á aðalfundum 2015, 2016, 2018 og 2024.